ليبيا: رسالة من إحدى الأخوات من بنغازي
الثالث 31 يناير 2012
هذا المقال جزء من تغطيتنا الخاصة بثورة ليبيا
انتقدت امرأة ليبية من بنغازي الرجال في بلدها لزواجهم من غير ليبيات بعد الثورة. ذاكرة على أن المرأة الليبية لم تحصل على المساواة في الحقوق مع الرجل. تكتب رسالة على فيسبوك بعنوان: “ رسالة طويلة من احدى الأخوات من بنغازي“:
«النص الأصلي:بصراحة الموضوع لازم نحكي فيه لانه يالي سمعته تبليه وضع النقاط علي الحروف
1- زواج رجالة بنغازي من السوريات يعني فضت في ليبيا وملقيتوش الا السوريات _مع احترامي لسوريات بس عيالنا علي قولت زيف الاسلام خط حمر وعريض _ في المرة الاولة لما شبابنا دبت فيهم النخوة وخذو من اليبيات يالي اهاليهن جو لبنغازي وهنا نحكي علي بنات اجدابيا وقلنا عادي برغم من وجود غصة لكن في الاخير بنت بلادي ومشينا الموضوع وتوا توصل بيكم تاخذو من النازحين من سورريا لليبيا ولا 40 شخص يعني العدد مش طشه الناس مليهمش اقل من شهر عندنا شوفو البنت ادرسوها كويس هل تنسبكم والا لا لكن طب لزق وتزوجو دغري هذه فأل شين ويستر ربي من الايام والعداد الجايا .
2-لا شكرا للمجلس الانتقالي علي فتح الابواب لكل ووحدة شقراء سمحة علي قولت عزايزنا نبيها ثلاجة توا المجلس كل ماله يدير في مشكلة في جرت مشكلة المرة الاولة تعدد الزوجات وتوا نزوح العرب الي ليبيا — نبي نوقف طشة علي موضوع هذا طبعا الدولة لما تكون فيها حرب فطبيعي انه الناس تهرب من هذه الدولة لانه الاوضاع فيها غير مستقرة نبي نفهم توا النزحين من سوريا واكرر مع احترامي لنازحين هل من الحكمة استقبالهم رغم اننا دولة غير مستقرة هل نفسية الموطنين اليبين تتحمل ضغط جديد عليهم هل المجلس مأخذش الابعاد من جلبهم يعني توا المجلس سبب في عنوسة 40 بنت ليبية متقولش ربي محلل بربعة ربي قال فعدلو انت وحدة ويادوبك تبي تأخذ اربعة ..
3- ياسيدي مش عاجبتك بنت بنغازي امشي لطرابلس الزاوية طبعا مصراته وجبل نفوسة تحلمو بيهن بناتهم ..ياسيدي بنات الجنوب باهي اذا يأست بنات بني وليد سرت تورغاء طبعا كلامي هذا مش لرجالة بنغازي بل رجالة المنطقة الشرقية خففو شويا علي ما وصوكم راكم كثرتو.
4- قضية زواج اليبيات من غير اليبين قضية كبيرة ولها ابعاد واجدة اليوم كانت في مسيرة لامهات ليبيات متزوجات بغير ابن جلدتها يعني باليبي مش ولد بلادها يطالبن بحقوقهن كموطنات ليبيات وهو تسجيل ابنائهن بجنسيتهن …. هذا تبيلها وقفة ياخواتي اي نعم انا معاكي في بعض المتطلبات لكن اني نزوج غير ليبي ونعطي جنسيتي لابني هذا انا مش معاها ياختي الجنسية لابد من ان تكون من صلب الرجل ..اي نعم انا معاك في انه ابنك يدرس مجانا ويعامل معاملة اليبي ويعمل ويعين في ليبيا وان تأخذي جميع حقوقك كموطن ليبي حيث ان ليبيا لا تورث ليبيا لكل اليبين فلا يجوز ان يعطي الشباب امتيزات عن الفتاة زيي زي الشاب وهذا لازم ينحط في دستور .
5- طبعا بحكم عددنا كاليبيات أكثر من عدد الرجال فالمفروض اي قرار يتخذ يكون فيه بعد لقدام وبحكم اننا سندنا الثورة وسندنا ثورانا وسندنا بلادنا ودرنا يالي قدرنا عليه بعزم من ربي فكلام هنا ينراد لنقطة رقم واحد يعني هذا كله وماملش عينكم طيح الله سعدكم مصيركم بعد سنتين بعد مايطفشن منكم وياخذن العيال معاهن مرردكم لبنات بلادكم لانه اطبعاكم مايقدر عليهن الابنات بلادكم بس هذا اذا لقيتونا مش لكم فترة تعيطو تبو تطبيق الشريعة الاسلامية في نقطة هذه انا معاكم …ربي قال من ترضون دينه مقالش ياليبيه خوذي ليبي راهو تحسبو رواحكم بس يالي مركزين عليهم .
6- رسال جدية …. الي الاستاذ حزب … اذا كنت تريد ان تضمن صوت المرأة وانضمامها الي حزبك فأهتم بحقوقها التي نصها الله اولا وحقوقها كموطنة ليبية …
واخير انشالله يوفقنا الله في نشر ديننا الوسطي وخدمة وطننا وإنسانيتنا»
هذا المقال جزء من تغطيتنا الخاصة بثورة ليبيا
مصادر
[عدل]- نص مؤلف ومترجم برخصة المشاع الإبداعي نَسب المُصنَّف 3.0 غير موطَّنة (CC BY 3.0). «ليبيا: رسالة من إحدى الأخوات من بنغازي». الأصوات العالمية. 31 يناير - كانون الثاني 2012.
 شارك الخبر:
|
